Riku-Soin Ministro Balun iha Indonesia

Husi : Ekipa INDEPENDENTE

DILI:Komisaun Anti Korrupsaun (KAK) servisu hamutuk ho Komisi Pemberantasan Korupsi (KPK) Indonesia hodi identifika tuir riku-soin membru Governu Timor-Leste balun iha Indonesia.

Arjunto Komisariu KPK iha area Prevensaun no Edukasaun, Wuryono Prakoso deklara prontu apoiu KAK-TL hodi halo indentifikasaun klean ba informasaun katak membru Governu balun nia asset hanesan uma no kareta luxu iha Indonesia.

“Ami hakarak no prontu halo indentifikasaun ba koruptor iha Governu Timor-Leste ne’ebé halo uma no sosa kareta iha Indonesia,”dehan nia, bainhira partisipa Konferensi Internasionál ho tema “Partnership Conference Between CAC /CSO Timor-Leste no KPK/ICW Indonesia”, Iha Hotel Plama Surik–Mas, Kinta foin lalais.

Tanba, tuir nia dehan, atu indentifika koruptu hirak ne’e sei hein kooperasaun entre Governu Timor-Leste no Governu Indonesia, Ministériu Públiku Timor-Leste no Kejaksaan Agung Indonesia.

“Ami KPK no KAK-TL atu halo ona kooperasaun liu husi asina MoU hodi ajuda malu identifika koruptor sira iha kada nasaun ne’ebé halai tama ba nasaun viziñu ne’e,”nia informa.

Tanba ne’e, nia espera iha tinan ida ne’e KPK Indonesia no KAK-TL bele halo ona Kooperasaun iha area identifikasaun koruptor husi entre rai rua (2) ne’ebe lori osan halai ba tama Indoensia no TL.

“Ami rona membru Governu TL na’in rua nia asset iha Indonesia maibé seidauk simu informsaun no data husi KAK-TL ho eskrita tanba sei hein hela asina koooperasaun nota entendementu (MoU),”nia afirma.

KPK Indonesia no KAK-TL asina MoU nia dehan, hanesan baze legál atu KPK Indonesia halo identifikasaun no kaer membru Governu Timor-Leste nia asset iha Indonesia no KAK-TL mós identifika karik koruptu husi Indonesia mai TL.

“Bainhira MoU ne’e asina, ami ho kontente ajuda hodi buka tuir asset ne’ebé (membru Governu) rai ka investe iha Indonezia,”nia dehan.

Antes ne’e, Ministériu Públiku (MP) identifika membru Governu balun envolve aktu krime korrupsaun no mal-administrasaun. Kazu hamutuk sanulu resin-rua (12) ne’ebé hetan ona akuzasaun husi Ministériu Públiku (MP), atu halo prosesu julgamentu iha Tribunál Distritu Dili (TDD), tempu badak nia laran.

Ne’e duni, Prokuradór Jerál Repúblika (PJR), José Ximenes, aviza ba ministru no sekretáriu estadu balun atu prepara aan didi’ak hodi hataan sira nia hahalok ne'e iha Tribunál.

“La kleur tan ministru no sekretáriu estadu balun prepara ona atu ba tuir julgamentu,”dehan Prokuradór José Ximenes, bainhira loke semináriu kona-ba kontra korrupsaun ho tema “Prevenir no Reprimir”, iha Delta-Nova, Komoro, foin lalais.

Nia akresenta katak, krime korrupsaun dala barak envolve husi ema matenek sira. Maibé, difikuldade no problema ne'ebé MP hasoru atu halo investigasaun mak rekursu umanu.

Prokuradór José informa katak, iha fulan Fevereiru 2014 liubá, Prokuradór Jerál Repúblika (PJR) Timor-Leste estabelese ona kooperasaun ho Indonézia liu husi asina Memorandum of Understending (MoU) ho Komisi Pemberantasan Korupsi (KPK) no Pusat Pelaporan dan Analisis Transaksi Keuangan (PPATK) atu fó informasaun ba Ministériu Públiku (MP) kona-ba sasán, uma, karreta ne'ebé membru Governu balun “subar” iha Indonézia.

“Balun halo uma iha Bali ne'ebá, ne’e kalma de'it... hein de'it sira informa ba ita. KPK no PPATK iha hela. Sira informa mai ha'u, Timor-oan hira mak iha ne’e (Indonézia) ami hatene, hirak mak rai osan iha ne’e, hirak mak halo uma iha ne’e no hirak mak nia karreta BMW iha ne’e ami hatene,” haktuir Prokuradór José.

Nia dehan, se kuandu pesoál Ministériu Públiku kompleta hotu ona, ema ne'ebé envolve iha krime korrupsaun halai ba to’o iha ne'ebé de'it mós investigadór sira sei buka tuir.

“Komete krime korrupsaun halai mak biban de'it... tanba ita la divulga mas diretór barak mak ita akuza. Xefe Departamentu barak mak ita akuza no balun oras ne’e komarka ona no balun suspensaun,”dehan Prokuradór José Ximenes.

Entertantu, Presidente Parlamentu Nasionál, Vicente Gutteres aviza ba Ministériu Públiku atu nonok hodi hala’o investigasaun.

Jornal Independente
August 17