Oknum Polisia UTF Baku Deputadu: Fretilin husu SES investiga

FRETILIN fo semana ida deit ba SES atu halo investigasaun indisplinar

Kazu Oknum Polisia husi Unidade Taks Force, Distritu Dili ne’ebe baku deputadu bancada partido FRETILIN ne’e, Bancada FRETILIN fo prazu semana ida ba Sekretariu Estadu Seguransa (SES) halo investigasaun. 

Tempo semana ida ne’e Sekretariu Estado Seguransa la fo sai rejultadu investigasaun, Bancada FRETILIN abandona plenaria Parlamentu Nasional no komisaun sira. Ameasa abandona plenaria ne’e hato’o husi Deputada FRETILIN, Josefa Pereira wainhira fo intervensaun ba problema membru Parlamentu nebe tks Force sira baku ne’e iha plenaria. 

 “Bancada FRETILIN fo semana ida deit ba SES atu halo investigasaun indisplinar hodi ba hato’o nia rejultadu ba iha PN katak, semak sala se wainhira liu semana ida mak laiha deputadu sira husi bancada FRETILIN mak sei partisipa plenaria no komisaun,” dehan Josefa Pereira.

Deputada ne’e lamenta tebe-tebes ba atetude oknum PNTL liu-liu ba ekipa Unidade Taks Force ne’ebe mak inkapasidade no la professional, tanba ne’e nia husu ba SES atu hala’o investigasaun ida ne’ebe profunda karik PNTL maka sala tenki hasai nia husi polisia. 

Plenaria ne’ebe prezensa mos Sekretariu Estadu Seguransa ne’e, reprezetante povu iha uma fukun Parlamentu Nasional (PN) bancada FRETILIN, PD no Frente Mudanca ejiji ba Sekretariu Estadu no seguransa atu halo prosesu investigasaun profunda hodi suspende oknum taks Force ne’ebe baku Deputadu Manuel Castro. 

Presidenti Parlamentu nasional, Vicente Guterres hateten, iha Polisia Nasional Timor Leste iha professional diak tebe-tebes, nune’e tenki fo korazen no louva nune’e hato’o ba sira atu nune’e sira hadia liu tan sira nia lalaok ho kompetensia hodi separa ba polisia ida rua ne’ebe mak ho atetude la dun diak. 

“Ita bele justu ita kuandu kondena tudo uma coiza tenki haree ba realidade konkretu, objetivu ne’ebe iha ita as vezes komete mos injustica, ne’e mak hau husu barak ba instituisaun hanesan nu’udar Parlamentu Nasional mos ita tenki hare ba orgaun hotu-hotu, nune’e buat ne’ebe sala it abele kurizi, buat ne’ebe los it abele rekonese,” hateten Prezidenti PN Vicente Guterres iha Plenaria Parlamentu Nasional, (Tersa, 4/6). 

Iha plenaria deputado sira hato’o intervensaun ho hirus maibe Prezidenti Parlamentu Nasional, Vicente Guterres husu ba deputado sira kalma hato’o ida-idak nia intervensaun. Kazu Oknum Task Force ne’ebe baku deputadu Manuel Castro iha Estadiun Munisipal nia sorin iha dia, Sesta (31/5) tanba ne’e PN bolu orjenti Sekretariu Estadu Seguransa (SES) Francisco Guterres ba hatan iha PN. 

“Hau fo orientasaun ba komandante jeral katak, hahu hala’o investigasaun se laiha mak imi subar hau mak sei haruka investiga imi komandante sira ne’e hotu, nunee komandante jeral dehanba SES katak, nia hetan sei haruka investiga imi komandante sira ne’e hotu nune’e komandante sira ne’e hotu, nune’e komandante Jeral dehan ba SES katak, nia hetan sei foti medidas forte ba nia membru ida ne’e,” SES Francisco Guterres esplika ba deputadus sira iha PN Tersa (4/6). 

Nia dehan, iha dekreitu lei no 4/2011 rejimi juridiku katak, kualker membru ida kuandu nia halo atuasaun tenki konserva regulamentu ida ne’e wainhira la observa regulamentu ne’e nia tenki responsablidade ba ninia aksaun ida ne’ebe mak nia halo. 

“Ita buka atu hadia instituisaun ida ne’e maibe dala ruma ida rua nia hahalok bele estraga hafoer imajen instituisaun tomak tamba ne’e mak hau husu ba deputadu sira nia apoiu no nia ajuda buka oinsa atu ita kontinua hadia ho situasuan ho kondisaun ne’ebe mak susar tebe-tebes hodi rezolve problema barak,” tenik Francisco. 

Sekretariu Estadu ne’e mos fo informasaun ba deputadu sira katak, durante ne’e SES halo medidas displinar barak no halo demisaun barak iha komandante Distritu balun, ofisial superior 2 mak hasai ho ninia deivza ekivalen ho tanente kolonel ho sub tanente tamba sira la tuir regra. 

 “Hau sei lori deputadu Manuel Castro nia relatoriu hodi lori ba halo investigasaun klean ba se deit mak halo ida nia tenki responsabliza ba ninia an, tanba regulamentu uza forsa ne’e regula hotu ona katak saida mak sira halo husi terenu hanesan proteze polisia no mos ba komunidade,” dehan SES Francisco Guterres. 

Jornal Nacional Diario

05 Junho 2013