Bendito Husu Universidade Privadu Atu Semester Ida Atinji Fulan 6

Ministeriu Edukasaun (ME) sei kria lei no regulamentu ba Universidade iha Timor Leste (TL) tomak atu implementa semester ida tenki atinji fulan 6.

Bendito Freitas afirma asuntus ne’e iha lansamentu lian Materna iha Gleno hodi responde kona ba kualidade ensino superior tamba iha Timor Leste, tamba iha Universidade Privadu balun la produs rekursu humanus ho kualidade. 

Kestaun ne’e hato’o husi Ministru edukasaun perante estudante profesores no inan aman sira iha Gleno Distritu Ermera hodi responde ba prosesu aprendizazen Ensino Superior iha Universidade Privadu balun ne’ebe implementa deit semester pendek hodi kria rekursus humanus ne’ebe laiha kualidade, wainhira kompete iha Kampo de servisu.

Ministtru Edukasaun Bendito Freitas hateten, Ministeriu iha ona hanoin atu kria regulamentu ka lei ba Universidade privadu sira atu semester ida tenki atinji to’o fulan 6, nune’e wainhira sira remata sira nia kursu iha Ensino Superior tenki iha Rekursu Umanus ne’ebe kualidade.

“Ita hatene katak bainhira ita tau ekivalentes semester ida 6 mezes, tamba ida ne’e maka Universidade tenki priense duni kriterius ka regras 6 mezes atu bele hanorin estudante sira, dezenvolve duni sira nia pensamentu kritiku, sira nia lojika, estrutura hanoin, analiza sira ne’e atu bele hatene, se lae, ita semester ida mak reduz tiha ba fulan ida ou fulan rua, hau hanoin katak, ne’e difisil tebe-tebes ita atu fo garantia wainhira ita nia politika nasional ne’e hakarak promove edukasaun ida ho kualidade, ami haree hela atu tau regulamentu para kontrola, i ami mos sei halo suprevizaun atu sira tenki priense duni criteria ida ne’e,” dehan Bendito.

Antes ne’e, Primeiru Ministru Kay Rala xanana Gusmao mos preokupa ho sistema implementasaun TAS ou Tap Akhir Semester husi Universidade privadu balun ne’ebe fo graduasaun ba estudante sira la tuir ona sistema Ensino Superior.

Notisia Husi TVTL

Segunda-Kalan, 13 Maiu 2013