PN Aprova Orsamentu Pensaun Vitalisia

DILI – Liu husi sesaun debate orsamentu estadu periodu tranzitoriu, Segunda (8/10), Parlamentu Nasional aprova pensaun ba primeiru Prezidenti, primeiru membru Parlamentu Nasional no primeiru membru governu. Verba nebee aprova hetan valor orsamentu hamutuk US$ 175.000.

 Liu husi diskusaun nebee halao, deputadu Parlamentu Nasional Mario Viegas Carrascalão bankada Partidu Sosial Demokrata (PSD) no membru bankada Partidu Unidade Nasional (PUN) Fernanda Borges hatama proposta atu kansela dotasaun rubrika ministeriu finansa atu fo pensaun ba eis titulares sira tanba laiha impaktu referida pensaun no ekonomia ba estadu. 

Husi votasaun nebee halo atu kansela proposta nee hetan Afavor 15, Kontra 37 no abstain 7. Proposta nee la passa tanba hetan kontra makaas husi bankada Fretilin. 

Proponenti Mario Carrascalão hatete, proposta nee atu kansela pensaun ba eis titulares sira laos atu elimina lei pensaun vitalisia nebee hetan aprovasaun iha primeiru lezislatura Parlamentu Nasional. Tanba, pensaun nee posibilita deit ba sira nebee servisu tinan 5 bele hetan osan. 

"Ami halo proposta tanba tuir ami nia kampanha nia hakarak. Ami laiha interese ema seluk nia direitu. Esklui desizaun sosial nee, politika elitista sira deit mak hetan direitu ida nee."

Nunee, proponente seluk, Fernanda Borges hatete, pensaun ba eis titulares sira nee injusta tanba molok povu kiak sira seidauk simu pensaun, maibe servi uluk ba boot sira. "Reprezentante povu tenki halo buka uluk ba povu mak foin halo ba ita nia aan". 

Tuir nia, sira nebee atu hetan direitu nee defende sira nia aan rasik. Defalktu, nasaun nee tenki halo progresu barak. 

Membru bankada Fretilin Jose Texeira nebee kontra proporta kanselamentu nee hatete, PN tenki tuir saida mak lei iha. Labele hanorin saida mak ema seluk nia mai iha Timor. 

Hanesan mos ho Ozorio Florindo husi bankada Fretilin hatete, proposta nee retorika politika hodi lakohi fo apoiu ba nia ema sira nebee mak luta. 

Nunee, Primeiru Ministru Xanana Gusmão hatete, governu nia pozisaun labele halo buat ida tanba iha ona lei numeru 7/2007 nebee aprova husi primeiru lezislatura nebee maioria Fretilin. 

Laos governu nia hakarak atu defende pensaun ba eis titulares sira, maibe atu defende proposta kanselamentu pensaun nee tenki ajusta didiak lei nee. Neduni, lei nee partensi ba PN atu korizi.

STL Edition: 09 October 2007 

PN Aprova Orsamentu Pensaun Vitalisia