TLPC hasoru malu ho Vise PM La Sama

Radio, online – Lideransa organizasaun jornalista, Timor Leste Press Club (TLPC) ne’ebe lidera husi Jose Belo ho nia strutura hasoru malu ho Vise Primeiru Ministru (PM) Fernando La Sama de Araujo, foin lalais ne’e, (23/5).

Objektivu sorumutu ne’e hodi rona aprezentasaun hosi TLPC nian kona-ba planu organizasaun ne’e nian hodi hala’o konferensia nasional iha tempu badak ne’e, nomos rona aprezentasaun kona-ba difikuldade ne’ebe sira hasoru durante ne’e.

Durante sorumutu ne’e, lideransa TLPC aprezenta katak objektivu prinsipal hosi konferensia nasional ne’e mak atu transforma organizasaun refere ba formatu organizasaun foun ida, hodi nune’e bele submete-an ba iha federasaun jornalismu internasional (IFJ).

Ho transformasaun ne’e espera katak bele lori area jornalismu iha Timor-Leste ba iha mundu internasional.

Hafoin rona aprezentasaun hirak ne’e, Vise Primeiru Ministru hateten katak governu iha responsabilidade atu fo apoiu ba area jornalismu iha rai laran, hodi nune’e Vise Xefi Governu ne’e husu atu jornalista nasional sira bele organiza malu di’ak liu-tan, atu governu mos bele tau matan di’ak liu-tan iha area ida ne’e.

“Imi tenki hamutuk, atu nune’e bele ajuda governu hodi tau matan ba area ida ne’e”, apelu Vise Primeiru Ministru iha sorumutu ne’e.

Hodi hadi’a liu-tan kapasidade jornalista sira nian iha Timor-Leste, Vise Xefi Governu ne’e mos husu ba organizasaun TLPC atu dezenvolve programa treinamentu jornalismu nian iha rai laran, liu-liu iha area

ne’ebe spesifiku.

Organizasaun “Timor-Leste Press Club” harii iha tinan 2009 ho membru inisiu hamutuk na’in 11. Oras ne’e dadaun, organizasaun refere iha ona ninia membru hamutuk na’in 140.

Iha kongresu nasional ne’ebe hala’o foin lalais ne’e, Jose Belo no Jose Sarito sai nu’udar Prezidenti no Sekretariu Jeral organizasaun ne’e nian ba periodu 2013 to’o 2016.

25 May 2013 

radioliberdadedili.com