Bidau Lecidere Vensedor Suku Saudavel

DILI - Suku Bidau Lecidere sai vensedor ba programa suku saudavel iha Distritu Dili ba tinan ne'e.

Rezultadu ida ne'e fo sai liu husi avaliasaun ne'ebe halao husi ekipa ne'ebe kompostu husi Sekretariadu Estado Meiu Ambiente (SEMA), Ministeriu Saude (MS), Ministeriu Administrasaun Estatal no Sekretariadu Estado Agua Saneamentu no Urbanizasaun (SEASU).

       Suku Bidau Lesidere halakon Suku 24 iha Díli ne’ebe maka tama mós iha avaliasaun. Suku Bidau Lecidere sai vensedór tanba kumpri hotu criteria ne’ebe fó sai husi ekipa katak sai Suku ne’ebe moos no saudável kompara ho Suku sira seluk iha Distritu Díli.

       Iha rezultadu avaliasaun ne’e ekipa avaliasaun deside Suku 8 maka sai vensedór ba programa Suku saudável ne’e. Suku hirak ne’e maka hanesan primeiru lugar husi Suku Bidau Lesidere hetan sertifikado ho orsamentu $1000, Segundu lugar Suku  Culuhun hetan sertifikado ho orsamentu $800.

Terseiru lugar Suku Kresenfort hetan sertifikado ho orsamentu $600, kuatru lugar Suku Fatuhada hetan sertifikado ho orsamentu $400, Kintu lugar Suku Vila-Verde hetan sertifikado ho orsamentu $250, sestu lugar Suku Comoro hetan sertifikado ho orsamentu $200.

Sétimu lugar Suku Metiaut hetan sertifikado ho orsamentu $150 no oitavu lugar 8 Suku Motael hetan sertifikado ho orsamentu $100.

Objetivu husi programa suku saudável tuir Sekretariu Estado Meiu Ambiente (SEMA), Nominando Buras hanesan parte ida atu sensibilija entidade hotu ninia konsensia oinsa atu hadia no hamoos bairo hotu hodi soe foer ba iha fatin lixu liu-liu iha uma laran rasik. 

“Ami halo estudu komparativu iha Bali-Indonézia, tanba sa maka Bali ne’e furak nafatin, tanba jestaun governu nian maka kapas liu,”dehan  nia iha Jardin Borja da Costa Farol-Dili, Kuarta (05/6).

Ho hanoin ida ne’e maka agora dau-daun Sekretariadu Estadu Meiu Ambiente hamosu programa ida ne’e.

Iha oportunidade ne’e, Xefi Suku Bidau Lecidere, Felix Celetino da Silva Conceicao, senti kontenti no hato’o obrigado wain ba komunidade sira hotu iha Bidau Lesidere tanba iha komprensaun makas atu hamoos ida-idak nia uma hun.

“Ha’u mós fó parabens ba hau nia komunidade sira hotu ho populasaun tomak husi Suku Bidau Lecidere ne’ebe maka iha ona kumpriensaun bele hatene ona oinsa atu hamos uma hun no mos oinsa lori sasan foer ne’ebe iha ba tua iha lixu fatin,”nia dehan.

Nia parte sei mantein atu sai nafatin Suku ne’ebe moos no saudável hodi bele compete tan to’o iha nivel nasionál.

Total populasaun Suku Bidau Lecidere inklui estranjeiru hamutuk 1480 ho total uma kain hamutuk 250. (jos)

Timor Post

07 Juni 2013