LABEH Ejiji Estado Ratifika The International Anti Money Laundering Regime no establese Unidade Intelijensia Financeira ou Financial Intelligence Unit (FIU)

Dili, 6 – 6 – 2013

Dili- Organizasaun Naun Governamental Lalenok Ba Ema Hotu (LABEH) liu husi servisu departementu transparencia no akuntabilidade detekta ona Membru governu balun iha konta bankaria iha rai liur ne'ebe bele sai ameasa ba krimi fase osan nian ou Money Laundering.

Oras ne'e dadaun mundo tomak halo kampanye makas no luta hela ba Anti Money Laundering ho kriminaliza aktus tranzaksaun ida ne'e.

Money Laundering ou “Fase Osan” nu'udar sistema transferensia osan husi hahalok krime publiku nian hanesan korupsaun, ne'ebe transfere husi banku ida iha nasaun ida ba banku iha nasaun seluk no Timor Leste tenki evita ona aktu ne'e tamba hahalok fase osan ne'e edentiku liu ho ema ne'ebe iha poder atu ukun.

Atu antisipa aktu krimi financeiru ne'ebe komesa invade Timor ne'e, LABEH hakarak ejiji ba Estado Timor Leste atu ratifika rejime internasional ba fase osan nian ou The International Anti Money Laundering Regime no establese Unidade Intelijensia Financeira ou Financial Intelligence Unit (FIU) ne’ebe bele halo servisu diak liu tan hodi kontrola tranzaksaun osan husi ema sira ne'ebe kaer poder no ukun.

Estado tenki hari ona ho urjente, Unidade Intelijensia Financial hodi bele hahu establese koperasaun ho banku privadu no publiku iha Timor Leste atu bele kontrola tranzaksaun osan husi membru governu no funsionariu publiku sira no LABEH hakarak fo atensaun ba estado atu konsidera ameasas money laundering hanesan krimi ekstraordinariu ida ne'ebe la kontribui ba boa governasaun, transparencia no akuntabilidade nian ne'ebe nasaun ne'e komesa tane no hahi.

LABEH ejiji mos atu Ministeriu Publiku atu establese unidade anti korupsaun iha Tribunais sira nune'e servisu kombate korupsaun bele la'o efektivu no bele haforsa liu tan prosesu foti desizaun ne'ebe justu ba koruptor sira.

LABEH iha tempu besik sei realiza audensia ou diskusaun ho Sociedade Sivil, Parlamentu Nasional no Asosiasaun Advogado Timor Leste nian atu deskute konaba posibilidade kriasaun lei domestiku ba Anti Money Laundering nian.

LABEH mos sei fasilita diskusaun konaba Financial Action Task Force (FATF) konaba stratejia prevensaun ba Money Laundering nain iha Timor Leste hodi nune'e bele hametin nafatin interese atu nune'e bele garante mos osan mina rai nian ne'ebe hahu gasta dadaun bele responde duni ejijensia boa governasaun, transparencia no akuntabilidade.

Povu tomak presiza hatene katak Timor Leste oras ne'e iha ona osan mina hamutuk 13, 6 billiaun no dadaun ne'e explorasaun mina no gas produz osan hamutuk 324 miliaun kada fulan. REMATA

LABEH.org