Lei Pensaun Vitalisia “FRETILIN-PD Konkorda Ku’a Vensimentu 25%”

Deputadu sira husi Bancada FRETILIN ho Bancada Partidu Demokratiku (PD) pronto sai proponeti atu hato’o proposta ba meza Pelanria Parlamentu nasional atu bele kua vensimentu 25 husi pensaun eis tiular sira. 

Tanba pensaun 100% ne’ebe eis titular sira simu nia impaktu halo povu kiik sira mak sai vitima liu iha vida ekonomia loro-loron, tanba folin sasan iha merkadoria mos kontinua as ba beibeik. 

“Preokupasaun husi ita nia sosieade sivil sira ne’e los, tanba ita nia povu ne’e hatene hela ita nia politiku sira kuandu halo kampania promete dehan atu muda lei pensaun vitalisia, maibe agora tur tiha iha Parlamentu ema ida nunka book an,” deputada Ilda Maria de Concecao husi Bancada FRETILIN ba Timor Post iha PN, Segunda (03/6).

 Nia haktuir, uluk bancada opozisaun FRETILIN hatama ona proposta ida ba meza atu muda lei pensaun vitalisia ne’e hatun ba 75% maibe proposta ne’e parte bloku koligasaun tau fali iha gabeta okos. 

 Nia hatutan, FRETILIN la konkorda mos atu hasa’e salariu seputadu ho membru governu sira nian, se atu hasae tenki hahu husi baze ou nivel um, no labele hasa’e nivel boot deit. 

Nune’e mos Deputadu paulino Monteiro husi bancada PD pronto sai proponente atu muda lei pensaun vitalisia, laos ba deit membru parlamentu terseira lejislatura, maibe aplika mos ba eis deputadu terseira lejislatura, maibe aplika mos ba membru deputadu no membru governu sira seluk. 

 Nune’e mos, Deputada Birgida Antonia Correia husi Bancada CNRT , konkorda ideias Prezidenti Republika atu muda lei pensaun vitalisia, nasaun barak aplika maibe iha kategoria hanesan iha mandatu tinan lima hetan vensimentu 50%, mandatu tinan 10 hetan 75% no mandatu tinan 15 tuituir malu bele hetan pensaun 100% husi salariu baziku. 

Iha parte seluk, sosieade sivil propoin atu estadu envolve eis titulares ne’ebe produtivu maka involve iha prosesu dezenvolvimentu hodi lori nasaun ba oin. 

Durante ne’e mos, tuir sosieade sivil nia observasaun, eis titulares ne’ebe fo kontribuisaun ba dezenvolvimentu maka hanesan, Prezidenti Partidu FRETILIN, Dr. Farncisco Guterres Lu-Olo no Sekretariu jeral FRETILIN, Dr. Mari Alkatiri, maibe eis deputadu sira nein fo kontribuisaun. 

“Tanba ne’e, ami propoin osan pensaun vitalisia ne’e tenke fob a eis titulares ne’ebe produtivu, maibe ba eis deputadu sira ne’ebe la fo kontribuisaun ba dezenvolvimentu, diak liu hapara, ne’e gasta osan saugate,” Propoin Diretor Luta Hamutuk Interinu Zenelton Zeneves ba Timor Post iha nia kna’ar fatin, segunda (3/6).

Jornal Timor Post

04 Junho 2013