Universidade Nacional Timor Lorosae (UNTL) halo Akordu ho Universidade Catolica Portuguesa (UCP)

Lisboa - Universidade Nacional Timor Loro Sa´e (UNTL) liu husi Dekanu Faculdade Ciências Sociais, Martinho Pereira no Chefe do Departamento da Comunicação Social (CS), Filomeno Jacques Fernandes, halo ona akordu ida ho Universidade Católica Portuguesa (UCP) hodi kria relasaun no koperasaun entre Universidade rua ne´e hodi hakbiit no hasa´e kualidade ba kursu Comunicação Social iha UNTL.

Akordu ne´e halo diretamente ho Vice-reitor UCP José Tolentino Mendonça no Diretór Faculdade de Ciências e Humanas (FCH) José Miguel Sardica iha salaun biblioteka UCP nian iha Lisboa, Sexta-feira (08/03/2012) semana ne´e, hanesan pasu ida tan ba koperasaun kursu Comunicação Social durante estabelese iha UNTL.

Iha fatin ne´e, vice-reitor UCP hateten Timor- Leste no Portugal hanesan ona maun ho alin, no liu husi koperasaun ne´e bele hametin liu tan amizade no solidariedade.

“Ho koperasaun ida ne´e, ita bele hametin amizade no solidariedade entre Timor no Portugal, hanesan Ruy Cinnaty (Poeta Portugés) no reinu Timor uluk sira ne´ebé maka promesa ona liu husi ran hodi konsidera malu nu´udar maun no alin iha tempu uluk” Haktuir Vice reitor ne´e.

Nia mós hatutan, ho kuñesementu ne´ebé maka estudante komunikasaun sira hetan iha Portugal bele uza hodi kontribui ba dezenvolvimentu no estadu Timor.

“Ho kuñesementu ne´ebé maka ita boot sira hetan, bele uza fali hodi kontribui ba dezenvolvimentu no estadu Timor ne´ebé maka foin halo tinan sanulu”, rekomenda Vice-reitor ne´e ba estudante Comunicação Social, UNTL, ne´ebé maka hala´o ona estudu iha universidade ne´e molok simu sertifikadu.

Tuir mai husi parte UNTL, reprezenta husi Dekanu Fisipol hato´o mós agradesimentu ba UCP.

“Agradese barak ba Universidade ne´e, tambá bele fasilita hodi prepara ona fini balun ida ho kualidade ba futuru hodi kontribui ba dezenvolvimentu Timor-Leste no ho ida ne´e bele mantén tan amizade no solidariedade” Agradese Dekanu.

Nune´e mós Gabinete dos Meios da Comunicação Social (GMCS) ne´ebé maka teknikamente durante ne´e apoiu ona prezensa estudante Comunicação Social, UNTL, iha Portugal iha ambitu programa apoiu União Europeia ne´ebé kompostu estudante na´in sanulu resin rua, liu husi nia Diretor Sergio da Silva sente haksolok tambá estudante sira bele tuir materia semestre ida nian hodi konsege to´o hetan rezultadu final.

Iha sorin seluk, estudante Komunikasaun UNTL Dircia Pires Galhos sente orgullu ho nia finalidade maski antes ne´e hetan obstakúlu oin oin.

“Ohin loron ne´e ha´u senti orgullu tebes ho finalidade ne´e, tamba ha´u bele termina duni kursu no misaun ne´ebé mak durante ne´e ha´u hala´o ona iha UCP ho susesu mas antes ne´e ho obstakúlu oioin maibé ha´u bele pasa duni “ hateten estudante grupu dahuluk ne´e ho kontente no orgullu.

Ikus mai molok atu finaliza aktividade ne´e hanesan kostume ne´ebé Timor oan sira halo wainhira hasoru ka simu ema foun ruma, diretamente husi dekanu Fisipol tara tais ba Vice-reitor UCP, Direitor FCH no ba Direitor GMCS hanesan simbolu amizade no solidariedade. Nune´e mós husi parte fakuldade, hala´o vizita guiada ida ba Dekanu no Xefe departamentu komunikasaun hodi observa diretamente iha FCH. (CS/Rafy)

Fonte: Rafy Belo Atl (FB)