Alkatiri halo enkontro ho orgaun estado konaba Projeitu Master Plan

Alkatiri halo enkontro ho orgaun estado konaba Projeitu Master Plan

Tersa-Feira, 23 husi Abril 2013

Dili, Segunda feira (22/4) semana ne’e Eis Primeiru Ministru, Mari Alkatiri halo aprezentasaun konaba planu Master Plan liu liu projeitu piloto Master Plan Ba Zona Especial De Economia Social De Mercado De Timor Leste, Ba Distrito Oecusse.

Aprezentasaun ne’e realiza iha salaun Ministeriu Financas ho partisipasaun husi  Primeiro Ministro, Kay Rala Xanana Gusmão, Vice Primeiro Ministro, Dr. Fernando Lasama, Ministro Negocio Estrangeiro, Dr. Jose Luis Guterres.

Sorumuto ne’e mos partisipa husi Chefe de Bancadas Parlamento Nacional (Deputado Natalino dos Santos, Chefe Bancada CNRT, Deputado Aniceto Guterres, Chefe Bancada Fretilin, Deputado Lurdes Bessa, Chefe Bancada PD, Deputado Benvida Caitano Belo,Chefe Bancada Frenti Mudansa halo Sorumutu hamutuk inklui mos ekipa Profesionais balun.

Iha parte seluk, Lalenok Ba Ema Hotu – LABEH hanesan ONG ne’ebe luta ba promove transparencia, akuntabilidade no boa governasaun liu husi kombate korupsaun hakarak extende ami nia apoiu ba Eis Primeiru Ministru, Mari Alkatiri ne’ebe iha komitmentu bo’ot hodi dezenvolve projeitu Master Plan ne’ebe sei implementa Ba Zona Especial De Economia Social De Mercado De Timor Leste, (Projecto Piloto Ba Distrito Oecusse).

LABEH louve tebes komitmentu husi Mari Alkatiri nian ne’ebe halo tiha ona estudo komparativu ida klean konaba projetu Master Plan ne’ebe dadauk ona iha etapa final dezenho nian. 

Direitor Executivu LABEH, Julio Gil da Silva Guterres hakarak fo apreciasaun ba Mari Alkatiri no husu atu prosesu tomak ne’ebe planu hela tenki transparente no akuntavel ba publiku molok implementasaun, tamba ho  nune’e mak projetu pilotu ne’e bele hetan konfiansa no apoiu maximo husi povu Timor tomak liu – liu populasaun Oekusi ne’ebe sei sai hanesan primeiru benefisiariu ba planu infraestrutura bo’ot estado nian.

“Dr. Mari Alkatiri hatene ho didiak no kuidadu katak projeitu pilotu ba Zona Especial De Economia Social De Mercado De Timor Leste, Distritu Oekusi ne’e projeitu ida presiza apoiu moral husi parte hotu hotu liu – liu makina estado nian ba suseso de implementasaun, no LABEH fiar katak Dr. Alkatiri iha korajen atu socializa ho transparente planu mestri ne’e molok implementasaun” Gil da Silva haktuir.

LABEH hakarak bolu atensaun mos ba V Governu Konstituisional liu – liu Ministeriu Financas no Ministeriu Obras Publika atu aplika jestaun servisu aproviozionamentu ne’ebe transparente no akuntabel ba implementasaun projeitu piloto ne’ebe lidera husi Eis Titular ne’e atu nune’e bele fo impaktu positivu iha rezultado evaluasaun pojeitu nian. 

LABEH husu mos ba Inspektur Jeral da Republika, Francisco Carvalho atu forma ekipa task force ida hodi monitoriza lalaok implementasaun projeitu piloto ne’e.(*/CJITL)

Fonte/CJITL