Labele Husik BANDIDU iha Autoridade Mak Manda

Distritu Viqueque labele husik Bandidu iha, Polísia Nasionál Timór-Leste (PNTL) hanesan autoridade, entaun PNTL mak manda, la’os Bandidu mak manda no domina fali, liafuan ne’e Prokuradór Jerál Repúblika (PJR), Dr. José Ximenes apela ba PNTL sira iha edifisiu PNTL Distritu Viqueque nian molok ba vizita delegasaun Prokuradoria Distritál Baucau (PDB) iha Viqueque.

Iha dadersan, PJR ho nia komitiva to iha Viqueque, PNTL Distritu refere simu PJR ho animasaun formatura no tara tais, iha altura ne’e PJR no Inspektór Ministériu Públiku (MP), Dr. Arlindo Figueiredo e Silva, husik hela sira nia tempu durante oras balun nia laran hodi inkontru ho Komandante PNTL, membru PNTL no Xefe Servisu Investigasaun Kriminál Distritu Viqueque nian.

Iha inkontru laran, Komandante PNTL Distritu Viqueque, Justino Menezes informa situasaun inkéretu durante ne’e ba PJR, Menezes subliña katak durante fulan-Janeiru to’o agora iha sansaun disiplinár ba membru PNTL nain haat, hanesan falta servisu nain rua no nain rua laiha responsablidade ba sira nia servisu, sansaun ba sira tanba husik suspeitu sira halai liu nune’e mós ami nia estrutura atuál sei nafatin hanesan uluk, sedauk iha mundasa durante PJR sei hanesan Xefe Prokuradór Distritál Baucau.

Kona-ba rekursu, dala ruma ami nia servisu sempre failla tanba rekursu seidauk to’o, tanba ne’e ami presiza atu aumenta tan iha tempu badak no ami nia membru investigasaun sira kada tinan tenke iha formasaun ruma ba sira atu nune’e bele kapasita sira nia a’an sai professionál liu tan, tanba ne’e ami husu ba PJR atu buka meiu halonusá hodi fó formasaun ba ami nia membru sira seksaun investigasaun kriminál nian, atu nune’e sira mós bele komprende, liu-liu lei hanesan Kódigu Prosesu Penál, iha àrea violénsia doméstika, informa Komandante PNTL Disktritu Viqueque nian ne’e.

PJR sente laran haksolok tebes bainhira hasoru malu ho Komandu PNTL ho nia memru sira, ha’u sente orgullu no kontente tebes bainhira hasoru malu fali ho imi hotu (PNTL) iha fatin ida ne’e, Komandu informa katak, estrutura to’o agora mantein nafatin, ida ne’e signifika katak, ekipa ne’ebé uluk Komandu forma hela la’o ho di’ak no hetan apoiu, husu atu kria nafatin kooperasaun no unidade hanesan ne’e, ida ne’e mak ita presiza tebes, dalaruma Komandu presiza halo alterasaun, hanesan prosesu dixiplinár, ida ne’e hatudu katak ita kontinua reforsa autoridade Komandu no hametin nafatin ita nia servisu sai di’ak liu tan, baihira ita metin mak ita sei bele rezolve ema nia problema, PJR haklaken lia hirak ne’e ba PNTL distritu Viqueque iha edifisiu PNTL Distritu Viqueque, Kuarta-feira (29/05).

PJR reafirma tan katak, saida mak presiza Prokuradoria Jerál fó apoiu ba imi ida ne’e presiza tebes atu ita apoiu ba malu, espesialmente relasaun servisu ho Investigasaun kriminál, ha’u hamrik iha ita bo’ot sira nia sorin, atu fó garantia ba ita nia komunidade iha ne’e katak, ita mak autoridade, investigadór sira mak autoridade, Polísia sira mak autoridade, ema labele rezolve ema nia problema ho uza nia forsa, lei prosedimentu iha dalan legál iha atu rezolve, tanba ne’e ha’u hamrik iha imi nia sorin hodi kaer bandidu sira ne’ebé gosta halo krime ne’e, tanba ne’e labele husik Bandidu iha, ita mak autoridade.

Nune’e PJR hatan ezijénsia PNTL sira-nian kona-ba formasaun, PJR promete katak, Livru kona ba Lei prosedimentu kriminál nian ha’u sei haruka ba iha tempu badak hodi halo kompletu no kestaun formasaun nian, ha’u aponta ona, formasaun ne’e la’os atu ita hanorin malu, krime nia evolusaun la’o nafatin, kriminozu sira halo planu nafatin, oinsá ho PNTL, PNTL mós labele lakon ho sira, tanba ne’e ita kontinua fó formasaun nafatin, formasuan kontinua halo ho nia objetivu rua, fó-hatene malu saida mak presiza ita atu halo no kontinua reforsa nafatin servisu investigasaun kriminál nian, ha’u nia presiza mak, justisa tenke la’o di’ak iha ne’e, Prokuradór mai besik ona, tanba ne’e ita nia komunidade sira tenke sente katak, iha justisa ba sira bainhira sira hetan insjustisa ruma, bainhira ita presta ita nia servisu ida ne’e komunidade sira sei fó fiar ba ita, hateten PJR.

Iha parte seluk maske PJR nia kondisaun saúde la-di’ak atu hala’o nia kna’ar, maibé ho esforsu tomak, PJR ho inspektór MP kontinua halo vizita ba delegasaun PDB nian iha Viqueque hodi haree no rona rasik situsaun no difikuldade ne’ebé Dr. Pascasio da Rosa ho nia ofisiál justisa nain rua hasoru.

http://www.mp.tl/