2014 TL sei harii embaixada iha Estadu membru ASEAN nian hothotu

Governu Timor-Leste, liu-liu Ministériu Negósiu Estranjeiru sei harii embaixada Timor-Leste nian haat iha Brimánia, Brunei, Laos no Kambodja iha tinan 2014, tanba nasaun hirak ne’e hanesan Estadu membru ASEAN.

Vise -ministru Negósiu Estranjeiru Constâncio Pinto ddehan katak atu harii embaixada hirak ne’e presiza orsamentu no halo parte mós iha prosesu adezaun Timór nian ba iha ASEAN. 

Sekretáriu Estadu Asuntu ASEAN, Roberto Sarmento informa katak Estadu membru husi ASEAN hanesan Indonézia, Malázia, Tailándia, Filipina, Singapura no Vietname iha ona embaixada husi Repúblika Demokrátika Timor-Leste nian. 

“Tinan oin ita tenki harii duni embaixada iha Birmánia, Brunei, Laos no Kambodja. Ha’u fi’ar katak ita sei bele harii duni”, tenik Roberto Sarmento iha Tersa-feira liu ba, iha Centro de Convenções Dili (CCD). 

Harii embaixada iha Estadu membru ASEAN nian hanesan kompromisu husi V Governu Konsitusionál hodi promove no hametin liu tan relasaun entre Timor-Leste ho Estadu membru ASEAN sira molok Timór halo parte iha organizasaun refere. 

Sapo TL ho STL 

31 de Maio de 2013