Lenda Crocodilo
Durante tinan 2011 ate tinan 2013 Komisaun anti Korrupsaun (KAK) konsege investiga ema husi nivel oi-oin nebe involve iha KKN no abuzu de poderes. Iha ema nain 62 maka sai hanesan suspeitu no ema nain 313 sai hanesan testamunia.
Ne’e maka relatori annual ne’ebe hato’o husi Komisariu KAK, DR. Aderito de Jesus Soares apresenta ba Parlamentu nasional Iha loron tersa feira (14/05).
Iha relatoriu refere KAK dekreta katak instituisaun ne’ebe ninia emar barak liu maka deskonfia involve iha KKN no abuze de poderes mak Radio Televizaun Timor Leste – Empresa publiku (RTTL-EP) ho total suspeitu hamutuk ema nain sanolu resin hat.
Iha relatoriu refere Komisariu Aderito De Jesus, sani sai lista arguido nain hat nolu resin walu husi instituisaun estadu sanolu resin rua seluk hanesan eis Ministeiru Dezenvolvimentu Ekonomia iha mane nain neen mak arguido, mane nain neen seluk husi Ministeiru Edukasaun, Sekretariu do Estadu Obras Publika iha Ministeiru Infra estrutura ninian mahon iha arguido mane nain lima, Tribunal de Rekursu arguido mane ida, Gabinete Vice PM iha ema ida maka arguido, Ministeiru Financas iha ema mane nain hat no feto ida maka arguido, Eis MTCI iha arguido mane nain tolu ho feto nain rua, Sekretariu meiu ambiente iha arguido mane ida, Ministeiru saude iha arguido mane ida, Parlamentu Nasional mane ida, Ministeiru justica arguido mane ida no husi parte non fungsionariu publiku hamutuk arguido nain sia.
Iha momentu hanesan Parlamentu Nasional expresa ninia apoiu total ba servisu Komisaun Anti Korrupsaun ninian hodi kombate KKN, Mal administrasaun no abuzu de poderes.
Membru Parlamentu nasional sira husu atu KAK halo inkeretu ba fungsionariu do estadu sira ne’e maka ho vencimentu naton de’it maibe riku matak de’it.
Iha parte seluk publiku iha esperanca bo’ot ba servisu Komisaun Anti Korrupsaun atu ka’er ema sira ne’ebe halo KKN maibe iha realidade lei ne’ebe Parlamentu nasional halo ladun foo kbiit ba KAK atu hala’o sira nia servisu ho efektivu hanesan KPK Indonesia ninian.
“Ami sempre foo sala ba KAK amibe haree fali ba lei ne’ebe iha ladun foo vantajen ba KAK atu hala’o ninia servisu. Lei ne’e la dualisme katak iha parte ida ita hotu hakarak kombate KKN maibe iha parte seluk lei ne’e rasik fraku los tan ba la foo kbiit ba KAK atu kaptura ema ruma hanesan KPK iha Indonesia,” dehan Afonso L. Da S. B. Soares, estudante UNTL Dili.
Estudante ne’e hatuir katak, “ha’u duvidas ho seriedade estadu ninian atu kombate KKN tan ba se haree husi lei ne’ebe iha ukun nain sira iha governu no parlamentu la seriu atu kombate KKN.”
“Ita hakarak KAK halo ida ne’e ka halo ida ne’eba. Maibe saida maka akontese? Ita hotu akompania deklarasaun husi ukun nain sira ninian iha televizaun foin lalais ne’e. Karik kombate KKN ho lalaok dualizme hanesan ne’e? Ha’u la fiar,” Universitariu ne’e kestiona.
Detallus seluk kona ba relatoriu KAK ninian, Jornal Tempo Semanal dada lia exkluxivu ho adjuntu komisariu KAK, DR. Jose Neves ne’ebe sei haktuir iha perguntas ho resposta iha artigu tuir mai. Nune'e husu atu sani nain sira akompania nafatin iha edisaun tuir mai.
20 May 2013
No comments:
Post a Comment