Lenda Crocodilo
Radio, online – Dili, iha Tersa loraik semana ne’e, Komisáriu Komisaun Anti-Korrrupsaun (KAK), Adérito de Jesus Soares hetan opportunidade primeira-vez husi Uma-Fukun Parlamentu Nasional hodi ba aprezenta relatóriu anual 2012 iha Sesaun Plenária. Iha oportunidade PN husu ba KAK atu nafatin halao servisu tuir lei hodi prevene no kombate korupsaun.
Komunikadu ne’e www.radioliberdadedili.com husi gabinete komisaun ba komunikasaun nian. Plenária ne’e Presidente Parlamentu Nasional Vicente Guterres mak prezide. Membrus Parlamentu Nasional nebé partisipa iha Sesaun Plenária ne’e liu 2/3 nebé reprezenta bankadas hat husi Partidu Konseilhu Nasional Rekonstrusaun Timorense (CNRT), Frente Revolusionária de Timor-Leste Independente (FRETILIN); Partidu Demokrátiku (PD); no Frente Mudansa (FM).
Iha aprezentasaun ne’e, Komisáriu Adérito la’os deit saliente kona-ba aktividades KAK nian nebé hala’o deit iha tinan 2012, maibe, iha oportunidade ida ne’e Komisáriu aprezenta panaroma jeral Komisaun nian nebé hahu servísu husi zero iha área prevensaun, investigasaun kriminal, edukasaun kampanya no peskiza durante tinan tolu nia laran.
Progresu iha áreas balu nebé Komisáriu Adérito hato’o inkluindu kapasitasaun ba rekursu umanu iha rai-laran no rai-liur iha áreas investigasaun, audit, sistema buka tuir gastus publiku no formasaun iha lingua ingles no Portugues. Iha mos progresu seluk mak hanesan kampaña públiku ba distritu 13 nebé involve ofisiais governantes iha ministériu, autoridade lokal, estudantes no sosiedade sivil sira.
Iha aprezentasaun ne’e, Komisáriu Adérito ho orgulhu hato’o progresu servisus nebé KAK hala’o ona tuir lei no plánu servisu anual nomos dezafius nebé infrenta. Membrus Parlamentu Nasional sira apresia tebes ho progresu ne’ebe KAK atinji ona maski ho rekursu nebé limitadu no reafirma sira nian apoiu politika ho moral atu KAK kontinua hala’o nafatin servisu hodi prevene no kombate korrupsaun iha Timor-Leste.
Nunemos, deputadu sira husi partidu politiku governantes no husi opozisaun nian ho unanimidade fo korajen ba instituisaun KAK atu mantein servisu nebé halao tiha ona durante tinan tolu nia laran no kontinua depozita sira nian korajen atu KAK halao servisu ba oin no labele tauk ba se karik iha ameasas ruma nebé mosu iha tempu oin.
Aprezentasaun nebé hetan akompanhamentu husi Jerente Senior KAK seluk, hetan transmisaun direta husi Televizaun no Radio Timor-Leste ba teritóriu tomak iha Timor-Leste. ***
Friday, 17 May 2013
www.radioliberdadedili.com
No comments:
Post a Comment