Kongresu Feto Timor-Leste IV: "Haforsa partisipasaun Feto iha Asaun no Progresu ba Dezenvolvimentu Nasional"

KONGRESU 

FETO TIMOR LESTE 

SEI HALAO DAHULUK IHA REJIAUN LIQUICA, 23-24 MAIO 2013

Rede Feto Timor Leste hetan mandatu no legitimidade atu organiza no fasilita prosesu konsultativu nasional, regional no distrital hodi rona feto sira nia lian, tinan hat dala ida iha Kongresu Feto Timor Leste. Rede Feto Timor-Leste halao ona I Kongresu iha tinan 2000, II Kongresu iha 2004, no III Kongresu iha 2008. Iha Kongresu Feto Nasional halibur reprezentante feto maluk sira hodi tuur diskuti no identifika hamutuk isu no problema mak feto Timor-Leste infrenta no iha plataforma asaun ba dala III identifika no rekomenda ona setor xaves 7 mak hanesan Edukasaun, Saúde, Justisa, Politika, Ekonomia, Kultura, no Média Transporte no Komunikasaun. 

Kongresu Nasional Feto ba dala IV tinan 2013 , Rede Feto Timor-Leste sei aprezenta rezultadu Monitorizasaun no Avaliasaun Plataforma Asaun III Kongresu iha area mak refere ona iha leten. Iha mos identifikasaun areas temátikas importantes no pertinentes atu debate no elabora iha deklarasaun konjunta no planu asaun hodi atinji misaun no objetivu mak ita hotu hakarak.

Kongresu Feto Timor Leste ba dahat tinan 2013 ho tema : Haforsa partisipasaun Feto iha Asaun no Progresu ba Dezenvolvimentu Nasional “ sei halao dahuluk iha nivel Região 3 ( Liquica, Ermera, Bobonaro ) iha loron 23-24 Maio 2013.

Iha ne’e, Rede Feto Timor-Leste hakarak anuncio ba públiku katak Kongresu Feto Timor-Leste ba dahat tinan 2013 ho tema : “Haforsa partisipasaun Feto iha Asaun no Progresu ba Dezenvolvimentu Nasional “ sei halao hanesan tuir mai ne’e:

1. Kongresu Rejional 

Iha 23-24 Maio 2013, Rede Feto sei hahu halao Kongresu Rejional iha distritu Liquiça (konpostu hosi distritu Liquiça, Ermera no Bobonaro). Loron 27-28 Maio 2013 sei halao Kongresu Rejional iha distritu Oecusse. Iha loron 6-7 Juñu 2013 sei halao Kongresu Rejional iha distritu Baucau konpostu hosi distritu: Baucau, Manatuto, Viqueque no Lautem) no Kongresu Rejional ikus nian sei halao iha loron 10-11 Juñu 2013 iha sub-distritu Maubisse konpostu hosi distritu: Ainaro, Aileu, Manufahi no Covalima).

2. Kongresu Nasional 

Iha fulan Julho 2013 sei halao Kongresu Nasional Feto Timor-Leste nian ba dahat nebé mai hosi konsultasaun nivel rejional no Nasional, iha Dili.

By: Rede Feto Timor Leste