"Unidade Krime Grave (UKG) sei informa prosesu krimi Grave 1999 ba Ministeriu Publiku (MP)"

Iha tempu besik Unidade Krime Grave sei informa prosesu krimi Grave ne’ebe akontese Iha 1999 ba Ministeriu Publiku (MP). 

 “Hau informa ba Prezidenti Republika (PR) katak, la kleur tan unidade krime graves sei intrega prosesu mai ita, maske balun seidauk akuza,” informa Prokurador Jeral republika, Jose da Costa Ximenes ba Jornalista sira iha palasiu prezidneti Nicolau Lobatu Bairo-Pite, Dili (03/6). 

Tuir Jose Ximenes katak, hafoin MP simu prosesu krime grave husi Unidade krime Grave, maka Timor-oan rasik mak sei kontinua prosesu kazu hirak ne’e. “prosesu krime graves ne’e intrega hela mai ita, para ita ida-idak prosesu ita nian, prosesu balun ne’ebe tama arquiva tama iha arquiva nasional ba krimi graves nian, maibe ba prosesu ne’ebe kontinua ita rasik mak tenke halo,” haktuir Jose Ximenes.

Maske Prokurador Jeral Republika ne’e la sita numeru no tipu kazu ne’ebe sei intrega husi unidade krimi graves maibe nia hateten numeru kazu barak konta ho krimi baibain sira ne’ebe mak akontese perante ne’e. 

Iha inkontru mensal ne’e, PJR, Jose Ximenes informa mos ba xefi estadu konaba nia vizita ba Distritu Oe-Cusse, Covalima, Baucau no Ermera hodi haree problema no frakeija ne’ebe prokurador Distritu sira infrenta, inklui servisu ne’ebe nia halao no atu halao ba oin tan. 

Nune’e mos nia informa tan ba PR kona ba prokurador estajariu nain 5 ne’ebe hetan ona tomada de pose husi komisaun iha foin lalais ne’e, hodi hala’o estajariu durante tinan ida. 

Durante estajariu fulan 3 ka 6, estajariu sira sei ba Distritu hodi hatene klean liu tan kona ba servisu hotu, nune’e wainhira simu mandatu ruma hodi halao kna’ar hanesan prokurador iha Distritu sir abele hatene ona prosesu servisu. 

Hafoin rona tiha informasaun husi prokurador jeral Republika, Prezidenti republika deklara katak, nia kontinua fo apoiu maka’as ba Ministeriu Publiku hodi halao nafatin servisu ho responsablidade no prinsipiu.

Jornal Timor Post

04 Junho 2013